10月26日

10月26是我的生晨，哈哈！
年年都要拎呢日假，過返個relax的一天！
睡到夠先起身，太耐冇唱k，趁平日當然同女朋友去唱個夠啦。
平時k lunch得兩個鐘，今日因為冇咩人，唱夠三個鐘。
如果唔係我地埋單，真係可以一直唱，勁過開演唱會！

之後去左一個好好玩的地方，$10玩兩個鐘，就係歷史博物館。
一樣，如果唔係佢要關館，真係可以玩好耐。
好多野睇，好多野玩。如果情侶想搵平的節目，呢個館絕對要去。
有d咩睇？我俾d相大家睇下啦！

晚餐去灣仔一間cafe，d野食幾好味，不過我對食真係冇咩要求，所以俾唔到咩comment。
食左︰
乜乜忌廉青口
東東意粉
西西芝士飯
心太軟

特別宵夜︰
同阿SAM及YUKI去左旺角一間「便所」食野，成間店都係廁所野，我亦都去左入面的廁所來一次真正的大小便。咁先係「主題」嘛！HAHA~~~~~~


今天的生日很開心，因為一元都唔駛出就過左，如果日日都係就最好。
不過，羊毛出自羊身上，來緊女朋友的生日真係有d壓力。

<兄弟>

今晚看完了<兄弟>

先談一談內容，故事的背景當然是黑社會，都係一些爭來爭去，殺來殺去的故事。

並不是十分新鮮，圍繞住的都是所謂的社團兄弟都係信唔過，甚至可能連親生兄弟都信唔過。
而故事發生到最後總會有一些人係真真正正的兄弟。

講到呢度，可能大家都覺得普通左d。

四虎真係今時不同往日，湯鎮業當年做<鹿鼎記>入面吳應熊，真係到宜家仲係二打六。

郭靖或喬峰的黃日華都真係殘晒，一d都型唔番。

至於三哥，比較穩陣，係多左少少魚尾紋。
劉德華都唔講太多，佢絕對係keep得最好的一個，只係嫌場數太少少……

講一講導演，其實我唔知係乜水因為我太膚淺。

我覺得有d廣告位實在太刻意……

總括來說

分數︰7/10 (有時間可以入場，唔係十分鍾意d演員可以買vcd，睇vcd都值的)

戲中金句︰

呢張椅除左姓譚的人之外，冇人可以坐，亦都冇人夠膽坐。

最後，送主題曲MV俾大家。

華仔好聽作品習 - 結婚進行曲

為了迎接劉德華演唱會，我打算定期post一些他近年的一些作品
當然，是我喜歡的作品，如果好聽就拍個掌啦！
繼上次的「冰雨」，今次我介紹另一首好聽歌曲

「結婚進行曲」

我願意 為了你 披上白紗衣
我願意 為了你 走在紅毯裡
我願為你 唱出一首 愛的戀曲
我願為你 造起一座 愛的屋頂
為你擋風遮雨 聊天泡茶下棋
只願今生有你

走在紅毯裡 被上白紗衣
你是我這一生中最美的約定
約了和你一起數星星
定了和你的每個天明
走在祝福裡 鐘聲又響起
你是我這一生中最美的決定
說好把幸福全給你
未來每個日子裡
我會更愛你

今年終極演唱會

劉德華２００７演唱會

絕對是今年的重頭戲
有十幾年未入場睇過佢的演唱會
我同自己講過
一係唔入場睇
一入場就要睇佢最貴的門票

今年好有機會
如果可以握到手
真係抵爆！

新武器

昨天去左阿SAM家玩Wii，其實唔係一d好靚的game
不過一班朋友一齊玩真係一個好好的選擇
有一d遊戲真的好搞笑
如果拍低埋再睇番就仲好笑
女仔似乎好鍾意玩，不過佢地話減到肥我就好有保留
anyway，如果有男仔想追女仔，Wii係一件唔錯的武器
有心的可以考慮下

冰雨

近來聽番呢首歌，真係幾好聽。
應該係華仔第一首自豪的填詞作品。
現在播出佢的型爆演唱會版及原裝MTV版被大家欣賞下。




我是在等待一個女孩 還是在等待沈淪苦海
一段情默默灌溉 沒有人去管花謝花開
無法肯定的愛 左右搖擺衹好把心酸往深心裡塞
我是在等待妳的回來 (嗯) 難道只換回一句活該
一個人靜靜發呆 兩個人卻有不同無奈
好好的一份愛啊怎麼會慢慢變壞

冷冷的冰雨在臉上胡亂的拍
暖暖的眼淚跟寒雨混成一塊
眼前的色彩 忽然被掩蓋
妳的影子無情在身邊徘徊

妳就像一個劊子手把我出賣
我的心彷彿被剌刀狠狠地宰
懸崖上的愛 誰會願意接受最痛的意外
(懸崖上的愛 誰會敢去採 還是願意接受最痛的意外 最愛的女孩)

德國隊率先打入歐洲國家盃決賽週

九場分組賽七勝二和，保持不敗。

共攻入三十一球，僅失四球。

真係好勁！

德國隊在世界盃經過奇哥的改造之後真係唔同晒，信心番晒來。

好期待你地的表現，一定要拎冠軍！

大時代2007

近排個股市真係幾恐怖，都唔知有乜咁好炒，可以升到咁。
行過銀行，d師奶阿婆真係排晒隊睇機，係咁講股，聽佢地的內容仲要係玩身家咁玩。
呢個係咩時代？
宜家冇一隻股夠膽買，手揸的又唔夠膽亦唔想放。
早前諗住見高放緊d，點知一放就升到媽媽聲。
唔放的又唔去，真係明燈……
據我呢個十九流分析員睇，唔大跌都唔好入市，睇下幾時爆好過。

Chicken Curry

其實我都唔想post上來，不過真係好好笑。
都唔知邊個upload上youtube，真係衰。

大家可能唔知乜野係chicken curry，其實佢係一個人。
冇錯，一個人，叫chicken。我地平時叫curry，或者雞爺。
其實佢個英文名係唔係叫curry，我都唔記得，仲知係咁叫，而且佢都會應。
其實curry係一個好人，成日都帶歡樂俾我地。
佢仲好有文彩，當年佢一望個天，就出一句「萬里無雲」，好經典。
運動亦得，場場去盡，成件衫都充滿男人味。
口才又好，乜都可以議論，好勁。
講左咁耐，想唔想識下佢？
其實佢係片入面都有份，出現在後面。
後排有兩個人，唔係成日望住鏡頭那位，係四眼o個位至真。
認住佢，下次見到佢，記住叫聲︰Chicken Curry。

兄弟團

今日是星期一，點降我會咁得閒寫blog？
好簡單，因為放假嘛！
尋日去左幫個中學同學做兄弟，真係朝七晚十二，回到家都真係累過打場波。
當然，比起道箕同伴郎仲要送主人家返屋企都唔好講太辛苦了。
不過尋日ge伴郎真係完全唔掂，跟出跟入好唔足呀！！
昨天的run down真係好順利，主人家的plan做得好好，又搵晒專業公司佈置，我地都有時間抖下。唔係咁順利的地方(又係上帝出場的時候)，真係好快搞掂，特別係搵路。(原來map king都唔可以盡信……)

玩新郎同兄弟都唔係好難，只係想講下次大家唔好玩d遊戲要搵野"lup"頭，set左成朝的頭一野冇晒好慘ga！

有機會係呢度post d相俾大家睇睇！

相機慾

近排又有番買相機的意慾，因為真係接受唔到前排換的禮品相機。雖然映相唔係靠機靚就得，不過部機唔掂真係好難搞。曾經諗過買部便的DSLR，可是真係唔想走入呢個黑洞，加上都唔鍾意成日拎部大鐵出街，想成日袋係袋玩下。近排，CANON出左G9，真係幾好。價錢比預期貴，可能要等佢跌下價。

危。戒

看完了「色。戒」，不算得上必定要看的電影，不過是值得入場看的。

大家一定會問情慾戲好唔好睇，講真，要睇可以買4仔睇，唔好諗住為o個幾場。
當然，那幾場係幾激的，不過有冇需要露咁多呢就真係各有各理。
成套戲，最討厭唔係梁朝偉，而係王力宏(入面的角色)，真係想講粗口。

分數︰80分(有10分係情慾)

舞動全城

呢排有時會睇「舞動全城」，我真係頂唔順。跳舞唔係問題，跳得好唔好都唔係問題，佢地係演員，唔係舞蹈員，所以只要唔係太樣衰都真係可以接受。最頂唔順，係乜鬼場合都跳，傾下計又跳，今晚講分手，突然又跳晒舞。真係搞 x 錯！不如跳住舞去廁所，跳住舞食早餐啦！把鬼火……